Debutoj te Basel: Konfirmohet interesimi i Kosovës për Bunjakun

Orges Bunjaku është futbollisti i radhës që Kosova synon ta ketë pjesë të saj. Mesfushori Bunjaku është duke u përcjellë nga vetë përzgjedhësi Bernard Challandes. Interesimin për Bunjakun e ka konfirmuar menaxheri i Kosovës, Bajram Shala.

“Përzgjedhësi Bernard Challand e ka përcjellë dhe e njeh atë”, ka thënë shkurt Shala për Sportin në KTV.

18-vjeçari kosovar mori lëvdata pas debutimit të suksesshëm në fundjavë me ekipin e parë të Baselit, pasi asistoi në golin e dytë në duelin që Baseli e fitoi ndaj Zurichut, 4:0.

Madje drejtori sportiv i Baselit, Ruedi Zbizden, kishte thënë se Bunjaku, që nga dita e parë e grumbullimit, ka treguar se ka dëshirë të luajë e jo vetëm të stërvitet me ekipin e parë.

Orges Bunjaku është zhvilluar si futbollist në Akademinë e Baselit, ndërsa me grupmoshën U21 të këtij ekipi ka një gol të shënuar në 14 ndeshje dhe ka kontratë deri në vitin 2022.

Bunjaku ka qenë edhe pjesë e të gjitha grupmoshave të Zvicrës dhe me grupmoshën U19, ka tri gola në gjashtë ballafaqime.